前一暫仔po文，紹介阮兜花園的花仔草仔，講著櫻花的果蓋酸，福木的果若熟有gá-suh味，有朋友回講，其實櫻花kah福木結的果攏會食tì，會當挽落來罔tām‑sám。
這位朋友講的規欉好好-無錯，櫻花結的果我食過，細加粒仔，就算講真夠分食起來kāng‑khuán酸ngiú ngiú，聽講有人會先sīnn過才食，tsit‑má網路頂面嘛有人sīnn規罐teh賣。
福木（毋知台語敢有其他的呼法？）我就kah無了解，論真kā想倒轉，我是一直到高中彼khám‑tsām，有同學tuà佇學校邊仔的眷村，幾個較mà-chih的，偷走學去in兜𨑨迌，才知影外省家庭佮意佇門口種福木，取一字「福」字，kah阮兜門口種桂花，取一個富「貴」的好吉兆差不多意思。
頂面的相片是阮兜的櫻花kah厝邊的福木，tshìn‑tshìn‑tshái-tshái都有兩三樓kuân，櫻花的樹身雖然tīng‑tauh，不而過有kah幼骨，有一年熱天拄著風颱欲來，我有吞肩放胛起手落插，peh起lih欲鋸寡tshiū‑ue，結果舞甲大粒汗細粒汗，規身驅phi̍h‑phi̍h‑tshuah，現此時若欲叫我為著幾粒仔m̄‑tsiânn‑mi̍h，koh再peh一擺，規氣kā我kā摃摃hōo死kah緊。
比較起來，福木就就簡單濟了，規欉ti̍t-lòng-sòng ，根本無kha-lōo通踏，連馬椅gia̍h來都無夠kuân，所以阮厝邊連peh都免peh攏直接放hōo爛，結果煞害過路人鼻著gá-suh味，khà電話去報消防隊。
所以我tsín懷疑，時代已經是對無步行來到有步，食食tsia̍h‑si̍t這呢phong‑phài，外送又koh這呢利便，敢真正還koh有人，甘願為著一屑屑仔有也好無也好的shuì-tsia̍h-mih，按呢huì‑khì‑huì‑tak、peh‑kuân‑peh‑kē、無閒無工，這就親像新店溪邊的弊案，算「美和」啦！
這hōo我想起阮阿娘講的一句俗語，是我細漢的時第一kái去釣魚，kuānn一跤牛乳粉kóng仔，內底十統尾的溪哥仔，雖然逐尾攏只有尾指指仔遐大爾，我嘛是真歡喜欲hōo阮阿娘加菜，誰知阿母看著kóng仔內的魚，笑甲足歡喜，講這就叫做：
唌貓袂走，唌狗袂吼，唌某袂到灶空口
唌siânn這字有kah生份，華語的意思，應該就是「誘」，我會記lih有一年，我替豬頭皮寫一塊歌，是改編香港電影「運財童子」的主題曲，歌詞內有用到這字「唌」，但是彼陣我毋捌字袂曉寫，所以寫做「誘」。
（有歌通聽：https://reurl.cc/9Zk1bX）
鼻空音是台語真大的一個特色，有真濟鼻音的字，聽起來就活靈靈有夠傳神，比論講，tsiūnn癢，kan‑na用講的，就感覺身軀一直癢起來，比論講siûnn𣻸，聽起來就膏膏黏黏，koh比論講ngiau擽，聽完嘛是規身攏會振動。
我有用網路查過，好親像無人紀錄過阿母教我的這句俗語，若用tsit‑má華語的流行話來講，完全有「既視感」，講了實在有夠實在，所以我一直記到現在，阮阿母雖然無讀過冊，不而過伊教我的俗語攏足有道理koh真心適，比論講政治人物，若著彼khoo四常跳票的bóo‑mí‑lâng上電視喙角全波，阮阿娘就會搖頭講：官做甲遐爾大，結果咬三喙袂見餡。
|
留言列表
留言列表
