忘了跳舞的熊的文字遊戲

熱。
　
算來地球去予人類耍甲強欲報銷去，本底五月節是天氣反熱的時間點，阿母講未食五月粽，破裘毋甘放，這馬是食完五月節粽，肥油袂堅凍，對寫歌的人來講，其實五月節嘛差不多是一年無閒的開始，唱片出版大月是年底，加上金曲獎報名，所以真濟穡頭，攏差不多佇新曆六月，也就是咱人五月開始。
　
面冊愈來愈無咧使用，回想疫情進前彼幾年，見擺若入城去工作開會，回程拄著窒車，為著避免心狂火著，我攏會想一寡有的無的四句聯做義量，比論講：
　
五日節後天反熱，三步兩步一身汗；下班趕緊欲來轉，滿天流雲來做伴。
　
毋過疫情了後罕咧出門，就較無咧想遮的，漸漸也減少網路的活動，三不五時講兩句，大部分攏是有歌出版，加減鬥宣傳的內容。
　
論真算來，半年來也有只有嘉慶君遊臺灣兩首歌出版，但是引起的反應袂少，尤其有一位老師，佇我鋪文無偌久了後，寫批來後台問我一寡問題，予我感覺真歡喜，暑氣全消，連肉粽都加食幾落粒。
　
我一直認為歌有命，一首歌發表了後，會隨著當時的空氣，社會的氣氛，人的心情種種，產生無仝款的運命，發展出無仝款的故事。
　
老師的問題算來簡單，伊想欲佇伊的班上教囡仔這首歌，當咧準備教材，有一寡內容來問予清楚，其實遊臺灣這塊歌，以文章來講，算真直接無什麼鋩鋩角角彎來曲去的siage，正經欲講有什麼「學問」，嘛只有資料的收集編寫較厚工爾，咱若去掀古早時代的歌仔冊，作詞者有真大部分攏是寫做「編詞」，大概就是這個概念。
　
問題回覆了後，本底叫是就無代誌，開始無閒煞落來的工課，過無幾工，這位老師又閣佮我聯絡，而且將伊上課的內容，學生仔的反應錄影翕相傳予我看。
　
咱佇下面看到的影片相片，攏是這位李清芬老師佇臺南市安南區和順國小一年仔上課的時翕的，伊講伊佮港嘛真有緣，伊是小港人，現此時佇臺南教臺語，除了和順國小，七股，西港攏有咧教課，自本是準備教材欲予高年級的同學來學習，想袂到連一年仔攏真有興趣，雖然真濟字還袂學著，仝款真唱甲真歡喜。
　
我有感覺著老師的用心，嘛有感覺的學生的熱情。
　
我向清芬老師討遮的資料，予我會當紀錄這個故事這段心情，原本以為伊若答應就會當，毋過老師真頂真，問過學校，問過學生，包括學生家長攏有同意，所以我才會當使用，這是現代意識佮現代科技產生的現象，就親像ＭＶ內底有幾字拼音重耽去，有熱心的聽友來指正，我也馬上反應予唱片公司，但是過程猶原開真濟時間，這攏予我這款老輩的人感覺敬畏，欲佇這個時代做代誌，毋是像俗語咧講「甘願做牛免驚無犁通拖」，有東時仔需要真濟專業的思考佮配合，還有真濟需要學習的所在。
　
寫歌的人，退來上基本的一步，也就是討趁工作生活，有福氣會當進一步用咱的歌，安慰一寡人的心情，陪伴一寡人的孤單，甚至帶予一寡人笑容，聽囡仔咧學習母語，咧唱歌的表情，真正連家己都真感動。
　
我定定咧想，檢采會當，我上希望我寫的歌服務的對象，是長輩佮晚輩，當然我了解少年人才是這個行業上大的支持者，但是少年人會當選擇的娛樂有真濟，分眾的時代，若有一首會當予序大人聽甲喜歡，與囝仔兄唱著快樂，應該是真幸福的代誌。
　
我敢若有淡薄仔彼款感覺。

#感謝臺南市安南區和順國小
#感謝李清芬老師
#感謝各位同學