忘了跳舞的熊的文字遊戲

　

　　
【烏暗音樂會】作詞：武雄　譜曲：王俊傑
　

　
　烏目鏡　烏西裝　烏色的鋼琴　烏色的薩克斯風
　暗光鳥　暗眠摸　暗頭仔六點　做伙來搧東風
　

　歡迎來到　烏暗音樂會　烏天暗地　大家凊彩坐
　一杯烏咖啡　一泡烏龍茶　我是烏狗兄　你是烏貓姊
    
　請你目睭瞌瞌（瞌瞌瞌瞌）　咱用歌聲來交陪
　
　我唱烏（烏～）　　　　　　你唱黑（黑～）
　我唱烏烏（烏烏～）　　　　你唱黑黑（黑黑～）
　我唱烏烏烏（烏烏烏～）　　你黑黑黑（黑黑黑～）

　烏暗的世界　請大家來這坐

　
　

　烏目鏡　烏西裝　烏色的舞台　烏色的麥克風
　暗光鳥　暗眠摸　暗時仔九點　暗爽會著內傷
　

　歡迎來到　烏暗音樂會　烏矸仔貯豆油　齣頭有夠濟
　一支烏吉他　一支烏鼓吹　快樂的歌聲　咱來唱規暝

　　　
　請你目睭瞌瞌（瞌瞌瞌瞌）　咱用歌聲來交陪

　
　我唱烏（烏～）　　　　　　你唱黑（黑～）
　我唱烏烏（烏烏～）　　　　你唱黑黑（黑黑～）
　我唱烏烏烏（烏烏烏～）　　你黑黑黑（黑黑黑～）

　烏暗的世界　色彩是有夠濟

　


　我唱烏（烏～）　　　　　　你唱黑（黑～）
　我唱烏烏（烏烏～）　　　　你唱黑黑（黑黑～）
　我唱烏烏烏（烏烏烏～）　　你黑黑黑（黑黑黑～）

　烏暗的世界　原來是這美麗

　作詞：武雄

　譜曲：王俊傑
　演唱：王俊傑（看無）
　編曲：Wilson  
　和聲編寫：王俊傑 
　合聲：王俊傑、黑視力樂坊、林郁菁、謝佩珊
　　　　楊宏偉、葉思騏、簡忠儒、廖翊婷
　配唱：何政毅
　製作：趙家駒
　發行：大吉祥（211210）
　
　

社會烏暗。

　
本底是幾落工前就欲寫，結果先是公投論戰，紲落來是八卦洗版，網路頂面大鼎滾細鼎也滾，皇帝急太監也急，所以暫時按下，好佳哉今仔日有一個閬縫，看範勢愛緊來處理一下，若無誰知影明仔在美國時間一到，又閣有什麼新的齣頭。
　
講起來社會烏暗這句話，應該是一種對現實的不滿，一種感慨，甚至一種諷刺，論真講是蓋嚴肅的代誌，猶毋過我自細漢聽人這句話，攏是用一種輕鬆孽譎的方式出現：日時駛車開大燈！而且那講閣那笑，果然是社會烏暗。
　
大概就是這款感覺，進前俊傑辦過幾落場烏暗音樂會，將所有的聽眾關佇咧一個暗眠摸烏密碼的所在，上蓋心適的畫面是，一陣目光的人，入去到伸指不見五手的室內，攏是靠青暝的工作人員𤆬路，才有法度揣到位坐好勢。
　
一般講來，目光的人雄雄若看無，心情應該攏是感覺恐怖，至少嘛淡薄仔驚惶，小可緊張，不而過，俊傑透過聲音，透過音樂，帶動現場的氣氛，變成一場充滿笑聲，輕鬆的演出。
　
這個經驗予我感覺真趣味，原來佇烏暗中，目光佮青暝完全反牌。
　
後來，我就將這個經驗寫做「烏暗音樂會」這個歌詞，我會記咧我有看過一組尪仔，是一篷烏人，彈琴的拍鼓的唱歌的，個個攏是烏目鏡，烏西裝，所以我就想講，若有一個樂團來唱這款歌詞，而且我特別設計台頂唱台跤應，應該會真鬧熱真趣味。
　
真歡喜真樂暢的歌，另日，你若是有機會佇現場聽俊傑演唱，該你唱的時陣，愛會記咧唱較大聲咧！